Andam na sa agresibo nga aksyon ang Gilas Pilipinas sa ilang pag-atubang sa New Zealand karong gabii sa ilang ikaduhang duwa sa nagpadayon nga FIBA Asia Cup nga gipahigayon sa Jeddah, Saudi Arabia.
Matod ni Gilas coach Tim Cone, dako ang pagkadismaya sa iyang mga magdudula human mapilde sila sa Chinese Taipei niadtong Miyerkules sa kadlawon.
Gikompirma ni Cone nga dismayado siya sa dagan sa duwa sa Gilas diin anaa sila sa “panic mode.”
Gidawat ni Cone ang responsibilidad sa kapildihan ug mitug-an nga adunay pipila ka mga bag-ong istratehiya silang buhaton aron makaabante sa quarterfinals.
Gikinahanglan nga modaog ang Gilas batok sa New Zealand ug Iraq aron makalusot ug makapadayon.
Human sa kapildihan kontra Chinese Taipei, naka-move on na ang team ug naningkamot na karon sa pagpangandam sa ilang mga sunod nga duwa.
Ang kadaogan batok sa ranggo 22 nga New Zealand mopahimutang sa Gilas isip numero 1 sa Group D ug makasulod dayon sa quarterfinals, apan magdependi kini sa resulta sa duwa tali sa Chinese Taipei ug Iraq.
Sa higayon nga modaog ang Gilas kontra Kiwis, mosulod sila sa quarterfinals pinaagi sa qualification game batok sa second o third placer sa Group C, nga naglangkob sa mga nasud nga China, Jordan, India, ug Saudi Arabia.
Apan nga mapakyas sila, dili na sila makakuha sa number 1 spot sa Group D, apan adunay posibilidad nga makasulod sa quarterfinals pinaagi sa knockout qualification game.
Gikinahanglan usab nga modaog sila batok sa Iraq aron masiguro ang ilang slot sa qualification game.