Gikatakda ang posibleng pag-oktaba sa Barangay ug Sangguniang Kabataan Elections (BSKE) karong tuiga, nga posibleng pirmahan ni Presidente Ferdinand Marcos Jr. sa umaabot nga Agosto 12, sumala sa pamahayag ni COMELEC Chairman George Erwin Garcia.
Sa pakighinabi sa Bombo Radyo Malaybalay kang Atty. Danilo Dividina, Election Officer sa Commission on Elections-Malaybalay City, taliwala sa posibleng pag-oktaba sa BSKE, padayon ang pagpangandam samtang wala pay opisyal nga kumpirmasyon kabahin niini. Nagkanayon nga kapin sa 1,600 ka indibidwal ang narehistro sulod sa unang tulo ka adlaw gikan sa Agosto 1, base sa ilang gipahigayong satellite registration.
Gihisgutan usab ni Atty. Dividina, nga kadaghanan sa mga miparehistro mao ang mga batan-on, nga andam nga mosalmot sa SK elections.
Giklaro niini, nga ang satellite registration nagpadayon sa matag barangay ug molungtad lamang sulod sa napulo ka adlaw.
Karong adlawa, anaa ang COMELEC team sa Barangay Manalog; ugma, sila sa Barangay Sumpong; sa Miyerkules, sa Provincial Detention and Rehabilitation Center (PDRC) alang sa mga Persons Deprived of Liberty (PDL); sa Agosto 7, aduna silay registration sa Barangay Bangcud sa buntag ug Barangay Simaya sa hapon; sunod sa Barangay Can-ayan sa Agosto 8; Barangay Upper Pulangi ug Barangay Kulaman sa Agosto 9; ug sa katapusang adlaw sa Agosto 10, magpadayon ang registration sa buhatan sa COMELEC-Malaybalay.
Gihangyo usab sa ahensiya ang tanang kwalipikadong botante, ilabina ang mga batan-on, nga mokompleto sa ilang rehistrasyon aron makaapil sa umaabot nga eleksyon.