Gipahugtan sa Police Regional Office 10 (PRO-10), ilawom sa liderato ni Regional Director PBGen. Rolando Suguilon, ang kampanya batok illegal nga droga ug uban pang porma sa kriminalidad sa rehiyon.
Sa pakighinabi sa Bombo Radyo Malaybalay, gipadayag ni Police Major Joann Navarro, tigpamaba sa PRO-10, nga dako ang kalampusan sa mga gipahigayong operasyon batok illegal nga droga.
Sa ilang malig-on nga operasyon, nakakumpiska ang kapulisan og illegal nga droga nga nagkantidad og P1.4 milyon sa Villanueva, Misamis Oriental; P2.7 milyon sa Iligan City; P3 milyon sa Jasaan; ug kapin o kulang P300,000 sa syudad sa Valencia, Bukidnon.
Gipasabot ni PMaj. Navarro, nga bisan pa sa 35% nga pagkunhod sa index crimes sulod sa usa ka buwan, nagpadayon ang kapulisan sa epektibong operasyon nga dili lamang base sa kadaghan sa insidente narespondehan, kondili sa kalidad sa ilang aksyon batok kriminalidad.
Miluwat si Navarro, nga sugod Hulyo 25 hangtod 31, kon sulod sa usa ka semana, mukabat sa kapin P10 milyon nga kantidad sa illegal nga droga ang nakumpiska sa tibuok rehiyon.
Gibutyag usab nga gitutokan sa PRO-10 ang illegal nga sugal, diin 13 ka operasyon ang gipahigayon nga misangpot sa pagkaaresto sa 30 ka mga indibidwal ug pagkakumpiska sa P9,214 nga gambling money.
Lakip usab sa operasyon ang pagkasikop sa 72 ka mga wanted persons, diin 13 niini ang Most Wanted sa regional level. Sa kampanya batok loose firearms, 15 ka operasyon ang gipahigayon nga misangpot sa pagkumpiska sa 15 ka armas ug pagkaaresto sa 5 ka suspek.
Gipalapdan usab ang kampanya batok smuggled goods, diin kapin P300,000 nga kantidad sa illegal nga sigarilyo ang nakumpiska.
Mipahigayon usab og duha ka laing operasyon sa illegal mining, nga miresulta sa pagkasakmit ang sa mga equipo nga nagkantidad og P19 milyon ug nadakpan ang pito (7) ka indibidwal.