Kapin sa 149 ka mga estudyante sa Basilan National High School ang gidali-dali pagdala sa balay tambalanan human magsakit ug nawad-an og animo gumikan sa gituhuang heat exhaustion sa ilang intramurals niadtong Huwebes.
Matud ni Jaime Juancho Rivera sa Isabela City Disaster Risk Reduction and Management Office (DRRMO), mga alas-3 sa hapon nagsugod ang maong insidente atol sa opening parade sa ilang intramurals.
Daghang ambulansya, lakip na ang gikan sa Lamitan City ug ubang ahensyang kagamhanan, ang miresponde sa unang batch nga kapin 50 ka estudyante.
Sa pagsugod sa parada, miabot sa 34.7°C ang temperatura sa Isabela City, sumala sa PAGASA Zamboanga station weather observer Rodel Inclan.
Mas daghan pang estudyante ang nakuyapan pasado alas-5 sa hapon, samtang nagpadayon ang kalihukan.
Base sa datos sa DRRMO sa Isabela, 149 ka estudyante ang gi-admit sa nagkalain-laing mga ospital, samtang 30 pa ang nitambag lang og medikal nga atensyon unya ra sa adlaw o gikuha dayon sa ilang mga ginikanan.
Pag-abot sa alas-11 sa gabii sa Huwebes, kadaghanan sa mga estudyante ang naka-recover na ug gipagawas sa ospital.
Gipadayag ni Rivera nga padayon pa ang imbestigasyon sa insidente kay aduna say mga estudyanteng na-ospital nga wala miapil sa parada ug dili pud taas ang ilang exposure sa kainit.
Gipahimangnoan sa lokal nga kagamhanan ang eskwelahan nga isuspenso ang tanang outdoor activities sa intramurals tali sa alas-12 sa udto hangtod alas-4 sa hapon.