Gilugwayan sa Bureau of Internal Revenue (BIR) ang deadline sa pagbayad ug pagsumite sa buhis alang sa mga dapit nga naapektohan sa bagyong Emong ug habagat. Ang extension naglakip sa dagkong taxpayers, mga authorized agent banks nga naapektohan, ug tanang revenue district offices o RDOs.
Apil usab ang mga rekisitos ug dokumento alang sa quarter nga natapos sa Hunyo 30 ning tuiga. Ang mga dokumento nga sakop sa extension naglakip sa quarterly nga impormasyon sa remittances sa overseas filipino workers (OFWs) nga exempted sa documentary stamp tax, pag-file o e-payment sa BIR Form 1600, ug pagsumite sa quarterly summary list sa mga baligya, palit o import sa mga VAT-registered taxpayers.
Lakip niini ang sworn statement nga gikinahanglan sa mga manufacturers ug importers nga may kalabutan sa produkto sa tabako, sweetened goods, ug ang pipila ka mga sales volume, ingon man ang e-filing ug e-payment sa quarterly value-added tax (VAT) return, quarterly percentage tax return, ug VAT return para sa mga non-resident digital service providers.
Matud ni BIR Commissioner Romeo Lumagui Jr., gihatagan nila og konsiderasyon ang kahimtang sa mga magbubuhis nga naapektohan sa kadaot nga dala sa panahon.