Gisaway sa pipila ka mga ekonomista ang bag-ohay lang nga pagbisita ni Presidente Ferdinand R. Marcos Jr. sa Estados Unidos, nga giingong usik lang sa kwarta ug panahon.
Matud ni Jhon Louie Sabal, usa ka ekonomista, igo lang migasto si Marcos sa iyang personal nga pakigpulong kang US President Donald Trump, ug wala kini’y klarong benepisyo nga nakuha alang sa nasud.
Gikompara pa kini sa ekonomista, sa Presidente sa Indonesia diin pinaagi lamang tawag sa telepono, nakakuha na kini og mas dako nga kasabutan.
Gidugang ni Sabal, nga langay ug pormalidad ra ang gipakita ni Marcos Jr. sa maong pakigpulong, diin mibyahe pa sa US ug nigasto og dakong kantidad, apan gamay ra ang nakuha nga mga pledges o saad.
Subay niini, giklaro sa ekonomista, nga ang pledges o gisaad kang Marcos usa pa lang ka verbal agreement ug wala pay pinirmahan nga posible pa nga dili kini matuman.
Tungod niini, nanawagan ang ekonomista sa Malacañang nga mas labing mayo nga adunay epektibo ug praktikal ang mga lakang sa Presidente, hilabi na sa mga panag-uban sa ubang nasud, aron mapaayo ang kahimtang sa ekonomiya sa Pilipinas.