Nagtuo si World Boxing Council (WBC) president Mauricio Sulaiman nga mainiton ang away sa boxing ring tali ni Filipino boxing icon Manny Pacquiao ug Mario Barrios.
Matod ni Sulaiman, wala siyay nakita nga sayop sa iyang desisyon nga tugutan si Pacquiao nga makig-away kang Barrios para sa welterweight title nga ipahigayon sa MGM Grand sa Las Vegas.
Gipasabot usab niya ang proseso nga ilang gisunod, lakip na ang pagpailawom ni Pacquiao sa medical examinations nga iyang napasa.
Nakakuha sab siya og lisensya gikan sa commission.
Gipasiugda ni Sulaiman nga ang estado sa Nevada usa sa pinakakugihan ug respetado nga boxing commission sa tibuok kalibutan.
Giaprobahan sab sa WBC board ang welterweight title fight ni Pacquiao batok kang Barrios.
Matod pa ni Sulaiman, nahimong emosyonal si Pacquiao nga gitawagan siya sa una nga championship belt diin gikan man sa WBC flyweight, ug karon usa na siya ka challenger sa WBC welterweight.
Gipapas usab ni Sulaiman ang mga pagduda kang Pacquiao tungod sa iyang edad nga 46, diin giingon sa uban nga dili na siya ka-perform og maayo.
Dugang pa ni Sulaiman, ang boxing usa ka contact sport og nakita niya nga si Pacquiao walay bisyo sama sa pag-inom ug alkohol ug dili sab siya sobraan sa timbang, diin mirsulta sa maayo nga kondisyon sa iyang lawas.