Nag-atubang og kontrobersiya ang usa ka izakaya bar sa Nagoya, Japan, gumikan sa talagsaon nga serbisyo nga ilang gitanyag sa mga kustomer.
Gawas sa ilang gi-offer nga lami ug crispy nga chicken karaage, ang maong bar nailhan usab sa ilang paghatag og libre nga “crispy spankings” ngadto sa mga bisita.
Sumala sa tagdumala, ang paghatag og sagpa usa kuno ka pamaagi nga nakapadani og daghang kustomer ug nakahatag og dako nga interes sa ilang establisyemento.
Sa sinugdanan, usa lamang ka waitress ang naghimo niini, ug buhaton lang kini og gusto sa kustomer nga makasinati sa maong serbisyo.
Tungod sa pagtaas sa interes sa mga bisita, mihire pa ang bar og dugang nga mga waitress nga andam mosagpa alang sa bayad nga 100 yen o mga P37 matag sagpa.
Gawas pa niini, ang mga bisita mahimong mobayad og 500 yen aron sila mismo ang mopili kung kinsa sa mga waitress ang ilang gustong mosagpa kanila.
Tungod sa kabibo nga dala sa serbisyo, daghang lokal ug internasyonal nga turista ang mibista aron masinati kini.
Apan human mikaylap ang video sa social media bahin sa maong serbisyo, nakadawat kini og daghang komentaryo ug kritisismo.
Resulta niini, ang tagdumala mihukom nga ihunong ang kontrobersiyal nga serbisyo.
Bisan wala gilatid kung kanus-a kini pormal nga gihatagan og katapusan, ang bar nagpabiling hinumduman sa kadaghanan tungod sa ilang lahi ug talagsaong paagi sa pagdani sa mga kustomer sa bar scene sa Japan.