Padayon ang pagdaghan sa mga nagsuporta sa pagbalik sa boxing ring sa Pinoy boxing icon nga si Manny Pacquiao.
Sa pipila ka semana nga pagbansay sa Los Angeles, kauban niini ang pipila ka ilado ug bag-ong mga boksingero.
Kauban sa iyang pagbansay, sila Teofimo Lopez ug Cris Cyborg nga mga champion fighters, ug ang elite contenders nga sila Vergil Ortiz Jr. ug Emiliano Vargas, lakip na usab ang mga batan-ong boksingero nga gusto mosunod sa mga kalampusan ni Pacquiao.
Matud ni Pacquiao, dako ang iyang pasalamat sa tanang nagsubay sa iyang pagbansay ug sa walay puas nga suporta sa iyang mga kauban nga boksingero.
Sa umaabot nga mga adlaw, mopatigbabaw ang kabug-at sa iyang pagbansay isip preparasyon sa umaabot niini nga away batok sa WBC welterweight champion nga si Mario Barrios Jr. karong Hulyo 19 sa Las Vegas.
Si Pacquiao adunay record nga 62 ka daug, 8 ka pildi, 2 ka draw, ug 39 ka knockouts; samtang si Barrios adunay 29 ka daug, 2 ka pildi, 1 ka draw, ug 18 ka knockouts.