Ginaduso sa Kongreso ang pag-ila sa mipanaw nga aktor comedy icon nga si Dolphy, isip usa ka National Artist.
Gipasaka ni Manila 3rd District Representative Joel Chua ang House Resolution 41 niadtong Miyerkules, Hulyo 9, usa ka adlaw sa wala pa ang ika-13 nga anibersaryo sa kamatayon ni Dolphy.
Ang titulo nga National Artist usa sa labing halangdong pasidungog nga gihatag sa mga indibidwal nga adunay dakong kontribusyon sa sining ug kultura sa Pilipinas.
Gisugyot sa resolusyon ang paghimo og pagdungog sa mga komitiba sa Creative Industries ug Basic Education & Culture aron pormal nga ma-nomina sa National Commission for Culture and the Arts (NCCA) ang mipanaw aktor nga si Rodolfo “Dolphy” Quizon Sr.
Namatay ang Comedy King sa Philippine cinema niadtong 2012 tungod sa multiple organ failure ug gilubong kini sa Heritage Park sa Taguig.