Misaka na sa 100 ka tawo ang namatay samtang daghan pa ang padayon nga gipangita human sa grabe nga pagbaha sa estado sa Texas, USA.
Sa Camp Mystic, usa ka Christian girls’ summer camp nga nahimutang sa Kerr County, duol sa nabahaan nga Guadalupe River, 27 ka mga bata ug usa ka counselor ang kumpirmadong patay, samtang 10 pa ka campers ug usa ka counselor ang nawawala.
Sa tibuok Kerr County, gikan sa 84 ka biktima, 56 niini mga hamtong ug 28 ang mga bata nga namatay tungod sa pagbaha sa Guadalupe River gumikan sa kusog nga ulan sa kaadlawon niadtong Biyernes, Hulyo 4.
Base sa datos sa sheriff’s office sa maong county, 22 ka hamtong ug 10 ka bata ang wala pa mailhi o ma-identify.
Matod ni Texas Governor Greg Abbott, padayon ang paningkamot sa mga rescuers sa pagpangita sa kadtong mga nawawala sa mga lugar nga grabe ang kadaot sa baha.
Gisugdan na usab sa kapin sa 20 ka state agencies ang ilang kooperasyon ug tabang sa mga operasyon sa pagbaha sa estado.
Gilauman nga mogaan na ang panahon sa gabii sa Martes sa Texas ug mas init na ang mga adlaw itandi sa milabay nga mga adlaw.
Samtang, daghang mga nasod ug internasyonal nga mga lider ang nagpahayag sa ilang simpatiya sa mga pamilya nga nawadaan og hinigugma tungod sa maong katalagman.
Nagpahayag si King Charles III nga misulat ni US President Donald Trump aron ipadayag ang iyang dakong kaguol sa trahedya ug ang iyang simpatya sa mga pamilya sa mga biktima.