Gikuwestiyon sa peryodista ug awtor nga si Philip Lustre Jr. ang reklamong cyberlibel batok kaniya tungod sa giingong sayop nga adres ug kawalay gipadayag nga reklamante.
Matud ni Lustre, wala pa siya makakita sa nagreklamo batok kaniya, hinungdan nga nagduda siya kung kinsa ang posibleng nalambigit sa maong kaso.
Gibutyag usab ni Lustre nga nagtuo siyang posibleng nalambigit sa reklamo si Manases Carpio o si Pulong Duterte, o silang duha.
Apan gipasiugda niyang pangagpas lamang kini tungod kay wala pa siyay kumpirmasyon kung kinsa ang reklamante.
Samtang, gitambagan si Lustre sa iyang abogado nga ipalhin sa Davao City ang pagdungog sa kaso, apan matud niya, ang legal nga pamaagi ipasagdan na niya kang Atty. Dino De Leon.
Gipahibalo usab ni Lustre nga hapit na niyang mahuman ang iyang sunod nga libro nga nag-ulohang “Misfits Sara,” nga maghisgot sa kinabuhi ug politika ni Bise Presidente Sara Duterte ug sa impeachment trial niini.