Gipanalipdan ug nagpasalamat ang asawa sa usa ka pasyente sa Bukidnon Provincial Medical Center (BPMC) sa maayong pag-atiman matud pa sa mga doktor, nga nakatabang sa pagpaayo sa iyang bana human kini naglisod sa paglakaw ug nagkinahanglan og dugang nga pagpanambal. Matud ni alyas “Lovelyn”, hapit na pito ka adlaw nga nagpa-ospital ang iyang bana ug giatiman kini sa mga doktor.
Gipasabot usab niini nga bisan gusto na niyang makagawas sa ospital, misalig siya sa tambag sa mga doktor nga maghulat hangtod mahimong stable ang kahimtang sa iyang bana.
Gisaysay niini nga una nang nadala sa pribadong ospital ang iyang bana, apan girekomendar nga mobalik alang sa dugang nga pagsusi ug pagpaospital. Matud niini, naglisod pa kini sa paglakaw ug pagtindog sa wala pa ma-admit sa BPMC.
Hugot usab nga gipasabot niini nga wala kini nagpasabot nga nilaban sa maong ospital apan gisaysay lamang niini ang ilang kasinatian.
Kini nga panghitabo, nag-ugat human sa isyu nga adunay mireklamo sa maong tambalan tungod sa pagbalibad niini sa usa ka pasyente nga gidala sa maong ospital.
Kahinumduman nga nanawagan si Barangay Casisang, Malaybalay City, Bukidnon Kapitan Gregorio D. Jaroy sa gobernador nga badlongon ang mga kawani sa Provincial Hospital nga giingong dili maayong pagtratar sa pasyente nga ilang gidala sa maong pasilidad.
Gani gipasabot sa asawa nga alang kaniya, maayo ang serbisyo sa BPMC tungod sa pagtagad sa mga doktor sa kahimtang sa iyang bana. Apan, wala siya mag-angkon nga parehas ang kasinatian sa tanang pasyente, kay ang iyang gipadayag gibase sa kaugalingong nasinati sa ospital.