Drug den sa CDO, girond; 9 sikop

Siyam ka indibidwal ang gidakop sa Philippine Drug Enforcement Agency Region 10 atol sa buy-bust operation sa usa ka subdivision sa Barangay Balulang, Cagayan de Oro City, diin nabungkag ang giingong drug den.

Sumala sa PDEA-10, usa sa mga gidakpan giingong maoy nagdumala sa maong lugar.

Narekober sa operasyon ang walo ka sachet sa gituohang shabu nga motimbang og 15 ka gramo ug nagkantidad og kapin P102,000, lakip ang lima ka gramo sa marijuana kush nga nagkantidad og P6,000.

Nakuha usab sa mga otoridad ang mga gamit nga may kalabotan sa ilegal nga droga, mga cellphone ug usa ka pickup truck.

Mag-atubang og mga kaso ang siyam ka gidakpan tungod sa giingong paglapas sa Comprehensive Dangerous Drugs Act of 2002.