Gipahibalo sa Office for Senior Citizens Affairs (OSCA) sa Malaybalay City nga mosaka sa ₱1,500 kada quarter sugod sa unang quarter sa 2027 ang lokal nga pension alang sa mga senior citizen nga nag-edad og 70 hangtod 89 anyos, gikan sa kasamtangang ₱900.
Matud ni Rene Y. Cipriano, hepe sa OSCA Malaybalay, adunay mokabat sa 17,400 ka rehistradong senior citizens sa 46 ka barangay sa siyudad. Gipasabot usab niya nga ang social pension nga ₱3,000 kada quarter alang lamang sa indigent senior citizens ug gidumala sa DSWD.
Dugang pa ni Cipriano, dili pa igo ang tabang sa gobyerno tungod sa pagsaka sa presyo sa mga palaliton, busa giawhag ang mga pamilya nga suportahan ang ilang mga tigulang. Giawhag usab niya ang mga senior citizen nga morehistro sa OSCA ug ireport sa ilang opisina ang mga establisementong dili mohatag sa gikinahanglang 20 porsiyentong diskwento.