Gipasidan-an sa usa ka economic development expert nga posibleng mas mobug-at ang kalisod sa mga ordinaryong Pilipino, ilabina sa umaabot nga Pasko, tungod sa padayong pagkahuyang sa piso batok sa dolyar ug pagsaka sa presyo sa mga palaliton.
Sa pakighinabi sa Bombo Radyo Malaybalay, gipadayag ni Ray Talimio Jr., kanhi miyembro sa Economic Development Committee sa RDC-10, nga lakip sa hinungdan niini ang pagkusog sa dolyar, taas nga inflation, pagsaka sa importasyon ug kawalay kasigurohan sa politika nga nakaapekto sa pagsalig sa mga investor.
Matod ni Talimio, bisan makabenepisyo ang mga pamilyang nakadawat og remittances gikan sa mga OFW, maglisod gihapon ang ordinaryong mga Pilipino tungod sa taas nga presyo sa pagkaon, lana ug ubos nga kita.
Gipasabot usab niini nga limitado lamang ang mahimo sa Bangko Sentral ng Pilipinas pinaagi sa pagpataas sa interest rates aron mapalig-on ang piso.
Sa laing bahin, giawhag ni Talimio ang gobyerno nga unahon ang pagpakunhod sa presyo sa pagkaon ug lana pinaagi sa koordinasyon sa nagkadaiyang ahensya aron mahupay ang epekto sa krisis sa ekonomiya.