Gipangayo sa Magsasaka Partylist ug Federation of Free Farmers ang interbensiyon sa Korte Suprema aron ipawalay-bisa ang Department of Justice Opinion No. 16, Series of 2026, nga ilang gikahadlokang makapaluya sa proteksiyon sa mga mag-uuma ubos sa Comprehensive Agrarian Reform Program o CARP.
Ubos sa maong opinyon, gikuwestiyon sa mga grupo ang kahimtang sa lima ka ektaryang limitasyon sa pagpabilin sa yutang pang-agrikultura.
Gikabalak-an sa mga grupo nga kon dili na mapatuman ang limitasyon sa pagpanag-iya sa yuta, mahimong mas daghan ang mag-uuma nga mapugos sa pagbaligya sa ilang mga uma tungod sa kalisod sa panginabuhi.
Posible usab kini nga makaapekto sa produksyon sa pagkaon kon mokunhod ang mga yutang tamnan.
Dugang pa sa grupo, ang ilang petisyon sa Korte Suprema naglakip sa hangyo nga magpagawas og Temporary Restraining Order o TRO aron mapugngan ang posibleng pagpatuman sa maong opinyon samtang wala pa kini masulbad sa korte.
Gipahayag nila ang panginahanglan sa klarong paghubad sa balaod aron mapanalipdan ang katungod sa mga mag-uuma ug masiguro ang padayon nga pagpatuman sa mga polisiya sa repormang agraryo.