Malaybalay City – Gituohan sa kapulisan nga panaglalis maoy hinungdan sa pananunggab sa usa ka lalaki nga karun nakaangkon og samad ug na-admit sa balay tambalanan, human sa insidente nga nahitabo sa Purok 3, Barangay Casisang, pasado alas 8:40 sa gabii, Hulyo 5, 2025.
Base sa imbestigasyon sa Malaybalay City Police Station, nag-inom ang grupo sa mga suspetsado sa usa ka tindahan dihang miabot ang biktima ug nangutana sa gubot nga ilang giatubang.
Kalit nga gidunggab sa usa ka suspek ang nawong sa biktima, samtang ang kauban niini mitira og daghang bato. Ang biktima, 40 anyos, minyo, gidala dayon sa balay tambalanan, samtang ang duha ka suspetsado—20 ug 37 anyos, managsama nga residente sa Barangay Magsaysay—nadakpan sa gipahigayong hot pursuit operation base sa pag-ila sa saksi.
Sa pagkakaron, anaa sa kustodiya sa Malaybalay PNP ang mga suspetsado ug posibleng atubangon nila ang kasong frustrated homicide samtang nagpadayon ang imbestigasyon.