Duha ka babayeng pasahero ang nadeklarang dead on arrival sa ospital human nawad-an og kontrol ang usa ka jeep ug nahagbong sa spillway diha sa Sitio Cable, Barangay Nangka, lungsod sa Libona, Bukidnon.
Subay sa impormasyon gikan sa otoridad, gikan sa Barangay Nangka ang maong jeep nga nagdala og lima ka pasahero paingong Baungon human nag-overtake kini sa usa ka sakyanan sa pabahada nga bahin sa kalsada. Nawad-an og kontrol ang 63-anyos nga drayber hinungdan nga mibangga kini sa concrete barrier ug nabangga pa ang usa ka nag-park nga motorcycle with sidecar sa kilid sa kalsada sa wala pa kini nahagbong sa sapa.
Gidala sa Libona MDRRMO sa Northern Mindanao Medical Center sa Cagayan de Oro City ang mga biktima, apan gideklarang dead on arrival ang usa ka 34-anyos ug 37-anyos nga pulos babayeng pasahero. Sa kasamtangan, natingkagol na sa pasilidad sa Libona Municipal Police Station ang drayber sa jeep alang sa sakto nga proseso.