Nagpadayon ang kabalaka sa mga mag-uuma sa Malaybalay City sa posibleng epekto sa Super El Niño, lakip ang kadaot sa humayan tungod sa baha ug ang gasto sa produksyon nga lisod mabawi sa ubos nga presyo sa palit sa humay.
Si Caesar Nequin, usa ka mag-uuma sa Barangay Violeta, miingon nga dili pa kaayo apektado ang ilang pananom tungod kay aduna pay mga pag-ulan sa probinsya. Apan gikabalak-an niini nga mas grabe ang epekto sa hulaw sa sunod nilang pagtanom.
Samtang, gipadayag usab niini ang kabug-at sa gasto sa produksyon, ilabi na sa pagpalit sa binhi ug ubang panginahanglan sa uma.
Tungod niini, nanawagan ang mag-uuma nga si Cevero Fortin, nga hatagan sila og dugang nga pagtagad pinaagi sa pagpataas sa presyo sa palit sa ilang humay aron makatabang sa pagbawi sa ilang puhunan.
Lakip niini ang panawagan nga palig-onon sa gobyerno ang suporta sa sektor sa agrikultura.