Nakalingkawas sa posibleng disgrasya ang upat ka babayeng estudyante human kalit nga natumba ang dakong Golden Trumpet Tree duol sa waiting shed atbang sa Bukidnon National High School o BNHS sa Sayre Highway, Malaybalay City, pasado alas 2:30 hangtod alas 3:00 sa hapon, Oktubre 19.
Sa pakighinabi sa Bombo Radyo Malaybalay, gibutyag ni BNHS security guard Eduardo Y. Mellendres nga una niyang namatikdan ang paglagitik sa kahoy, hinungdan nga gipahimangnoan niya ang mga estudyante nga maglikay sa lugar sa wala pa kini natumba.
Matod ni Mellendres, adunay miaging multicab nga naabtan sa pagkatumba sa kahoy, apan wala’y tawo nga naangol. Temporaryo usab nilang gipabilin sa sulod sa campus ang mga estudyante samtang nagpadayon ang clearing operation.
Samtang, gikumpirma ni Malaybalay CDRRMO Operations and Warning Division Chief Arian Johnson Caga-anan nga adunay bahin sa koral ug mga poste sa suga sa BNHS nga nadaot, apan wala pa matino ang kantidad sa kadaot.
Gibutyag usab niini nga adunay ubang mga kahoy nga natumba sa Barangay 3, Kalasungay ug Sumpong tungod sa kusog nga ulan, nga ilang girespondehan uban sa ubang ahensiya.
Sa laing bahin, giklaro ni PAGASA-Northern Mindanao Weather Specialist Catherine T. Asunto nga localized thunderstorms ang nakaapekto sa Northern Mindanao ug dili direktang epekto sa Super Typhoon Champi.
Tungod niini, giawhag sa CDRRMO ang publiko nga magbantay sa posibleng pagkatumba sa mga kahoy, ilabina sa mga lugar nga nahumok na ang yuta tungod sa ulan, ug ireport dayon ang mga peligro pinaagi sa ilang emergency hotline nga 0917-827-6117.