Gipalayas sa Philippine Coast Guard (PCG) ang usa ka langyaw nga fishing vessel nga nasigpatan sulod sa teritoryo sa Kota Island, West Philippine Sea, niadtong Domingo, usa ka tin-aw nga mensahe sa hugot nga pagpanalipod sa atong kadagatan batok sa bisan unsang pagsupak sa soberanya sa Pilipinas.
Matud ni Spokesperson Jay Tarriela, kini na ang ika-upat nga operasyon sa PCG sulod sa tulo ka semana, nagpakita sa ilang walay hunong nga pagbantay ug determinasyon sa pagpanalipod sa atong soberanya sa West Philippine Sea.
Gipahayag sa PCG nga samtang nagpatrolya ang ilang High-Speed Response Boat sa kritikal nga bahin sa West Philippine Sea, nasigpatan ang langyaw nga barko sa gilay-on nga 1.75 nautical miles sa amihanan ug amihanan-kasadpan, sulod sa 12 nautical mile nga teritoryo sa Pilipinas.
Gigamit sa PCG ang ilang rubber boats aron moduol sa langyaw nga barko, samtang balik-balik nga gipahimangnoan ang mga tripulante niini pinaagi sa radyo ug loudhailer nga mobiya dayon sa maong dapit aron malikayan ang dugang tensyon.
Kini usa lamang sa daghang higayon nga gipalayas sa PCG ang mga langyaw nga barko sulod sa teritoryo sa Pilipinas, lakip na ang insidente niadtong October 15 diin gipapahawa ang mga Chinese vessel ug upat ka gagmayng bangka duol sa Lawak Island, nagpakita sa padayon nga hagit sa maritime security.
Gipahinumdoman sa PCG nga hugot nga gidili ang pagpangisda sa mga langyaw sulod sa teritoryo sa Pilipinas nga walay pagtugot, subay sa mga probisyon sa Philippine Fisheries Code ug sa Philippine Maritime Zones Act, nga naghatag og lig-ong basehan sa ilang mga aksyon.
Dugang pa ni PCG Commandant Adm. Ronnie Gil Gavan, padayon nilang ipatuman ang hugot nga pagpatrolya sa Kalayaan Island Group, inubanan sa pakigtambayayong sa Philippine Marine Corps, aron masiguro ang seguridad ug soberanya sa nasud batok sa bisan unsang pagsulod sa mga langyaw.