Ang nagbitay ug nagkaguliyang nga mga kable sa poste, naila isip “spaghetti wires,” dugay nang naghatag og peligro sa publiko ug nagdaot sa atong mga imprastraktura.
Karon, usa ka bag-ong balaodnon ang nagtinguha nga tapuson kining problemaha.
Si Parañaque 2nd District Rep. Brian Yamsuan, pinaagi sa House Bill No. 11461, hugot nga nagduso sa pagpahamtang og bug-at nga multa ug pagsuspenso o pagbawi sa permit sa mga utility company nga magpasagad sa pagtangtang sa mga kable nga dili na magamit.
Ang maong balaodnon nagtumong sa pagtangtang sa mga nagkaguliyang ug nagbitay nga mga kable nga naghatag og dakong risgo sa kaluwasan sa katawhan ug sa integridad sa mga imprastraktura.
Giatasan usab niini ang mga utility provider nga ayuhon ug panalipdan ang ilang mga kable, tangtangon ang mga dili na magamit, ug ilisan o ayuhon ang mga guba nga poste.
Kinahanglan usab nilang sigurohon nga ang ilang mga linya nagsunod sa gitakda nga safety clearance ug regular nga inspeksyonon ang ilang mga pasilidad.
Sa higayon nga mahimong hingpit nga balaod, hatagan ang mga kumpanya og usa ka tuig aron makasunod sa tanang probisyon.
Ang mga dili makatuman sa mga probisyon sa kaluwasan sulod sa maong palugit pagamultahan og P300,000.
Samtang ang mga dili motangtang sa mga patay nga kable pagamultahan og dili moubos sa P100,000 matag adlaw sa paglapas.
Ubos usab sa balaodnon, ang mga utility company ang mosagubang sa tibuok gasto sa kadaot sa kabtangan ug medikal nga galastuhan kon adunay maangol tungod sa ilang mga kable.
Dugang pa niini, magbayad usab sila og multa nga dili moubos sa doble sa kantidad sa maong mga galastuhan.
Giatasan usab ang mga lokal nga kagamhanan (LGU) nga hugot nga bantayan ang pagsunod sa mga kumpanya sa balaod.
Aduna silay katungod sa pagsuspenso o pagbawi sa mga permit sa mga molapas sa mga sumbanan sa kaluwasan.
Kining balaodnon usa ka mahinungdanong lakang aron masiguro ang kaluwasan sa publiko ug mapreserbar ang kaayohan sa atong mga komunidad batok sa nagbitay nga mga kable sa poste.