Patay ang duha ka mag-uuma human nalambigit sa tradisyonal nga ritwal nga gitawag og “Sulif” aron husayon ang ilang panaglalis sa yuta sa Glamang River, Barangay Datal Anggas, Alabel, Sarangani Province, takna alas 10:00 sa buntag kagahapong adlawa, Oktubre 16.
Base sa taho sa Police Regional Office-12, ang mga biktima, nag-edad og 69 ug 49 anyos, pulos minyo ug residente sa maong barangay, nga boluntaryong miuyon sa maong pamaagi sa pagsulbad sa ilang panagbangi.
Apan, human sa gibana-banang 12 minutos nga paghumol sa tubig, wala na mitungha ang duha ka lalaki. Sa dihang gisusi sa nagdumala sa ritwal, wala na sila sa panimuot.
Gidala ang mga biktima sa pasilidad sa balay-tambalanan, diin gideklarang dead on arrival ang 69-anyos. Ang 49-anyos usab namatay pipila ka oras human sa insidente.
Ang Sulif o Sul’lif usa ka tradisyonal nga pamaagi sa pipila ka komunidad sa tribung Blaan ug Tagakaulo sa pagsulbad sa panaglalis, lakip na ang mga panagbangi sa yuta.
Ubos niini, ang mga naglalis maghumol sa tubig, diin ang unang motungha maoy giisip nga pildi sa ilang gilalisang kaso.