Nag-andam ang lokal nga kagamhanan sa Valencia City og pondo ug mga kagamitan aron matubag ang posibleng kakulang sa tubig ug uban pang epekto sa hulaw, lakip ang pagbutang sa mga water pump ug water tank sa mga lugar nga posibleng maapektuhan.
Matud Atty. Heinz G. Villanueva, Valencia City Administrator, adunay ₱100 milyong calamity fund alang sa mga emerhensiya, samtang naggahin usab og ₱1 milyon alang sa mga water pump nga magamit sa panahon sa kakulang sa tubig.
Gipahimutang usab sa City Disaster Risk Reduction and Management Office ang mga water tank, jetmatic pump ug hose nga magamit sa paghatod og tubig sa mga barangay nga manginahanglan niini.
Padayon usab ang pagmonitor sa kahimtang sa suplay sa tubig sa matag barangay.
Dugang niini, gipahayag sa lokal nga kagamhanan ang container gardening ug paghatag og binhi ug organikong abono aron matabangan ang mga mag-uuma ug pamilya sa pagpatubo og kaugalingong mga utanon.