Miani og negatibong reaksiyon gikan sa pipila ka residente sa Malaybalay City ang sugyot nga paggamit sa water filtration kit sa Department of Social Welfare and Development (DSWD) isip lakang sa pagpakunhod sa epekto sa El Niño.
Sa pakighinabi sa Bombo Radyo Malaybalay sa usa ka residente sa Kubayan, Casisang ang nag-ingon nga dili pa nila makita ang panginahanglan sa maong kagamitan tungod kay limpyo man matud pa ang tubig sa ilang lugar.
Gipahayag usab niini ang pagduhaduha sa kaluwasan sa tubig nga gamiton pinaagi sa water filtration kit ug miingon nga kinahanglan una kining bantayan ug susihon sa dili pa gamiton sa pag-inom.
Gibatikos usab niini gisugyot mismo sa presidente sa nasud nga si Ferdinand Marcos Jr., kalabot sa pagpalit og mga balde aron gamiton sa pagsalod og tubig panahon sa El Niño.
Taliwala niini, miingon ang residente nga bukas kini sa paggamit sa maong kagamitan depende sa resulta sa ilang obserbasyon sa kaluwasan niini.