Nagtuo ang kampo sa prosekusyon nga lig-on ug igo ang ebidensiya sa alegasyon sa unexplained wealth batok kang Bise Presidente Sara Duterte, busa kini na lamang ang ilang gipili nga ipadayon sa impeachment.
Gipasabot ni House Deputy Majority Leader Rep. Jude Acidre nga igo na ang usa ka artikulo sa impeachment aron mahimong basihan sa pagkonbikto isip silot, kon mapamatud-an ang mga alegasyon batok sa bise presidente.
Matud pa ni Acidre, sa ilang pagsusi, mas lig-on ang ilang baruganan sa ikaduhang artikulo nga may kalabutan sa wala matino nga tinubdan sa bahandi ni Duterte.
Dugang pa ni Acidre, gikonsidera usab sa prosecution ang panginahanglan nga mapadali ang impeachment aron dili na kini molungtad hangtod sa 2027.
Sa pagkakaron, ang alegasyon sa unexplained wealth mao ang bugtong artikulo sa impeachment nga gipadayon sa prosecution, nga matud pa ni Acidre, gibase sa ilang pagsalig sa kalig-on sa ebidensiya ug sa tinguha nga mahuman ang proseso sa dili pa kini molungtad pa og dugay.
Giklaro usab ni Acidre nga bisan gibawi ang duha ka artikulo, nagpadayon gihapon ang pagpangita og tulubagon pinaagi sa ubang mga proseso batok sa Bise Presidente.