$689-M nga Langyawng Inbestment Misulod sa Nasud sa Hulyo — BSP 

Niabot sa $689 milyon ang net Foreign Direct Investments (FDI) o mga langyawng puhunan nga misulod sa Pilipinas niadtong Hulyo.

Kini ang labing taas nga binulan nga antas sa sulod sa unom ka bulan, human kini misaka gikan sa $447 milyon sa miaging bulan sa Hunyo.

Bisan pa sa maong pagsaka kumpara sa nangaging mga bulan, ang datus gikan sa Bangko Sentral ng Pilipinas (BSP) nagpakita nga ubos gihapon kini og 44.1 porsiyento kon itandi sa $1.23 bilyon nga naitala sa parehong bulan niadtong miaging tuig.

Kasagaran sa maong mga puhunan gikan sa mga nasud nga Japan, United States, ug Singapore, ug direkta kining nidugang sa sektor sa manufacturing, panalapi ug seguridad, ug real estate sa nasud.