Malipayong giapaambit sa aktres nga si Maja Salvador ang ilang pagtambong sa misa ni Pope Leo XIV sa Roma, sa dihang mibisita kini sa Italya.
Kauban ni Maja ang iyang bana nga si Rambo Nuñez ug ang ilang anak nga si Maria sa papal audience sa Vatican.
Matud pa sa aktres, wala niini gisayangan ang oportunidad gumikan usa sab kini ka paagi aron mapalawom pa ang ilang espirituhanong panaw pinaagi sa pagbisita sa mga balaang dapit sa Italya, lakip na ang lubnganan ni Padre Pio, St. Peter’s Basilica, ug Basilica of St. Francis of Assisi.
Kahinumduman nga nanganak si Maja kang Maria niadtong Mayo 31, 2024 sa Canada. Samtang gikasal sila ni Rambo una sa usa ka civil ceremony niadtong Pebrero 2023, ug ikaduha sa ilang destination wedding sa Bali, Indonesia, lima ka bulan ang milabay human sa ilang unang kasal.
Sa pagkakaron, nakapokus si Maja sa pagpalig-on sa pagtukod sa ilang pamilya ug pagpalapad sa ilang papel isip ginikanan.