Gilusad karong adlawa ang Dugong Bombo 2026, “ A little pain, a life to gain kauban sa pakig-alayon sa Philippine Red Cross diin pagahimuon karong Nobyembre 14, 2026 ning sa Bukinon State University ning dakbayan sa Malaybalay.
Subay niini, gipalapdan sa Philippine Red Cross Bukidnon Chapter ang kampanya sa pagdonar og dugo aron masiguro ang igo nga suplay alang sa mga nanginahanglan og dugo ug platelet.
Sumala ni Joyce Daroy sa Philippine Red Cross Bukidnon Chapter, dako og tabang ang kanunay nga pagdonar sa dugo sa pagpadayon sa suplay sa mga pasilidad panglawas.
Gipadayag niini nga gikinahanglan ang regular nga donasyon aron mapadayon ang suplay gumikan daghan ug nakalain-laing matang sa sakit ang pagagamitan niini.
Gipahinumdoman usab ang publiko nga mubo lamang ang panahon nga magamit ang platelet human kini maproseso, busa importante ang padayon nga pagdonar.
Kabahin sa tibuok nasudnong kampanya ang maong kalihokan, nga gihimo matag tuig aron mapalapdan ang mga donor ug magpabling bastante ang suplay sa dugo.