Giprayoridad sa dakbayan sa Malaybalay ang 46 ka barangay sa pagpalig-on sa mga programa alang sa Indigenous Peoples o IP community, ilabi na sa pag-ila ug pagtubag sa ilang mga panginahanglan.
Sa pakighinabi sa Bombo Radyo Malaybalay kang Ma. Shirlene D. Sario, City Indigenous Peoples Representative sa siyudad sa Malaybalay, gibutyag niini kabahin sa maong lakang ang pag-update sa database sa mga IP community aron mas tukma nga mahibal-an ang ilang panginahanglan sa matag barangay.
Gamiton ang datos sa pagplano sa mga programa alang sa panginabuhian, ancestral domain ug uban pang serbisyo.
Gipadayag sa opisyal nga gihimo ang database alang sa 46 ka barangay, lakip ang mga panginahanglan nga hinay-hinay nang natubag. Matud niini, kapin 80 porsyento na sa mga barangay ang anaa sa maong database.
Gamiton usab ang mga datos sa pagplano sa mga programa ug polisiya nga direktang makatabang sa IP communities.
Lakip niini ang pagpalig-on sa ilang panginabuhian ug pagdumala sa ancestral domain. Matud sa opisyal, ilang i-integrate ang mga plano sa IP communities ngadto sa mga plano sa kagamhanan.
Usa usab sa ilang tumong ang paghimo og IP-focused legislative agenda. Gihisgutan sa opisyal ang mga livelihood program nga gipatuman sa pipila ka ancestral domain, lakip ang Buhita, Bukda, Daraguyan ug Kalasungay.
Lakip usab sa programa ang pagtanom og kahoy sulod sa tulo ka tuig.
Padayon usab ang pagpalambo sa mga oportunidad sa eco-cultural tourism alang sa IP communities.
Usa sa gihisgutan ang Malinaw Eco Park sa Kalasungay.
Gipasabot sa opisyal nga gitukod ang community-owned eco-cultural tourism ug giawhag ang ubang komunidad nga adunay potensyal nga mopresentar sa ilang mga plano alang niini.