Hayan maangkon na sa katawhan ang hingpit nga kasulbaran may kalabotan sa problema sa panubig ang atong syudad. Sa exclusibong pakighinabi sa Bombo Radyo Malaybalay kang Malaybalay City Councilor Jayson Chad Ayala, nga usa sa mga nag-unang hinungdan sa problema sa panubig mao ang kakulang sa aksyon sa PrimeWater arun hulipan ang mga daan ug guba nga water pipelines diin nagkutay sa mga kabalayan.
Sumala sa konsehal, nga bastante ang suplay sa tubig nga gikan sa Kibalabag source alang sa populasyon sa dakbayan pinaagi sa Malaybalay City Water District kon (MCWD) diin wala kini nagka- problema kaniadto sa production. Apan sa dihang moabot na kini sa distribusyon ngadto na sa mga kabalayan masinati na gilayon ang kakulang sa tubig. Gituohan nga ang mga tubo nga gigamit karaan na ug posibleng hinungdan sa leakage ug water loss, hinungdan nga walay agas ang mga gripo sa daghang panimalay.
Samtang , gi sugyot ni City Councelor Jayson Chad Ayala ang dakong papel sa mga private developer aron matubag ang panginahanglan sa mga residente. Matud ni Ayala nga dili na angay magsalig ang dagkong mga subdivision sa suplay sa tubig gikan sa Malaybalay City Water District. Gibutyag sa maong konsehal nga may kapasidad ang mga private developer nga magtukod sa ilang kaugalingong water system, nga makapamenos sa kalisod sa tubig.
Dugang pa nga ang tubig usa ka basic necessity diin dili anagay mapihig ang katawhan. Tungod sa kakulang sa tubig nag hatag ug inisyatiba ang syudad sa pag apud apud ug tubig pinaagi sa watertanks sa mga barangay nga apektado. Saysay pa niini nga sa wala pa ang gidumala sa Prime Water ang syudad adunay maayo nga distribusyon sa panubig nga giatiman sa Malaybalay City Water District.
Apan gumikan sa pagtubo sa populasyon ug paglambo sa syudad, misaka ang panginahanglan niini, hinungdan nga adunay kakulangon sa suplay. Gitumbok sa opisyal nga ang solusyon sa kakuwang sa tubig dili lamang responsibilidad sa kagamhanan, apan lakip usab sa mga pribadong sektor alang sa kaayohan sa komunidad.
Mahinumdanan nga gi imbestigahan ni pangulong Ferdinand Marcos ang Prime water sa tibuok nasud gumikan sa daghang reklamo nga nadawat niini.