850 ka miyembreo kapulisan gikan sa Northern Mindanao ang gipadala aron motabang sa pagsiguro sa kahapsay ug kalinaw sa unang parliamentary elections sa BARMM karong Septiyembre 14.
Gipahigayon ang send-off ceremony sa Camp 1Lt. Vicente G. Alagar sa Lapasan, Cagayan de Oro City kagahapong adlawa. Gipangulohan kini ni Northern Mindanao police director Brig. Gen. Nestor Babagay Jr.
Matud ni Babagay, dakong responsibilidad alang sa mga pulis ang pagserbisyo sa maong eleksyon. Lakip sa gipadala ang 380 ka personnel nga magsilbing special electoral boards sa mga presinto.
Aduna usab 77 ka pulis nga giasayn isip quick response teams alang sa posibleng mga insidente. Uban sa mga contingent ang command staff ug personnel gikan sa nagkalain-laing support units.
Gipahinumdoman ni Babagay ang mga kapulisan nga sundon ang operational procedures ug makigkoordina kanunay sa Comelec ug Armed Forces of the Philippines alang sa malinawon ug luwas nga eleksyon.