Gipatin-aw sa defense team ni Vice President Sara Duterte nga wala silay nakita nga irregularidad sa paggamit sa certification ni Col. Magtanggol Panopio isip liquidation document sa impeachment trial.
Matud sa abogado sa defense, ang maong certification gituyo lamang aron pagpamatuod nga nahimo ang youth leadership summits.
Bisan pa niini, nagdumili ang abogado sa paghatag og dugang detalye bahin sa maong dokumento, tungod kay mahimo na kini nga mosulod sa merits sa kaso ug sakop sa sub judice rule.
Giklaro usab sa defense nga alang kanila, walay nakitang irregularidad sa maong certification, apan ilang gipili nga dili na kini hisgutan sa media ug ipresentar na lamang sa impeachment court.
Matud sa abogado, ang mga senador-hukom ang adunay katungod sa paghubad ug pagtimbang sa kahulogan ug gibug-aton sa maong dokumento isip ebidensya.