Misaka na sa 33 ang gidaghanon sa mga namatay tungod sa hiniusang epekto sa habagat ug mga bagyong Luis, Maymay ug Neneng, sumala sa Office of Civil Defense kon OCD.
Sumala kang Office of Civil Defense Disaster Preparedness Service Director Vicente Gregorio Tomas, 19 ang nasamdan samtang tulo ang padayong missing.
Samtang, mikabat na sa 2.5 milyon ka pamilya o 8.8 milyon ka indibidwal ang naapektuhan sa dili maayong panahon sa nagkalain-laing bahin sa nasud.
Sa mga naapektuhan, kapin 164,500 ka indibidwal o 46,900 ka pamilya ang anaa karon sa evacuation centers.
Mokabat usab sa 3,300 ka balay ang nadaot, samtang gibanabana nga ₱6.12 bilyon ang kadaot sa imprastraktura ug ₱2.32 bilyon sa sektor sa agrikultura.
Adunay na usab 117 ka lugar nga gideklarar nga naa sa state of calamity, samtang kapin ₱1.78 bilyon nga ayuda ang nahatag na sa mga apektadong komunidad.