Gipasalig ni Philippine National Police (PNP) Chief PGen. Nicolas Torre III nga suportado niini ang mga lakang nga gipasiugda sa National Police Commission (NAPOLCOM) ilabi na ang mga disciplinary actions nga may kalabutan sa kaso sa 34 ka mga sabungerong nahanaw human nga giakusahan sa usa sa suspek nga mga pulis ang nalambigit matud pa sa maong kaso.
Ang kasong may kalabutan sa 34 ka nawala nga sabungero nagsugod niadtong 2021 hangtod 2022, diin gituohang giduot ang mga biktima sa mga illegal nga kalihokan may kalabotan sa e-sabong.
Pipila ka mga testigo ug giakusahan ang mipadayag nga adunay mga sakop sa kapulisan nga posibleng nalambigit sa ilang pagkawala.
Tungod niini, nagpahigayon karon og imbestigasyon ang NAPOLCOM aron tukion ug silutan ang mga pulis nga mapamatud-ang nalambigit sa maong kaso.
Gisuportahan kini ni PGen. Torre III aron mapalig-on ang disiplina sa han-ay sa kapulisan ug mahatagan hustisya ang mga pamilya sa mga nawalang sabungero.
Gipasabot usab sa PNP Chief nga kinahanglan nga di pasayloon ang mga abusadong pulis ug padayon nga magtinabangay ang mga ahensiya aron maprotektahan ang kridibilidad sa organisasyon.