Mihuyang sa bag-ong record closing low ang Philippine peso batok sa US dollar, human misira kini sa P61.88 batok sa dolyar.
Mas huyang kini og 23.8 sentimos tandi sa P61.65 nga closing rate niadtong Miyerkules ug nalabwan ang miaging record low nga P61.84 nga natala niadtong Hulyo 24.
Gipugos sa mga risgo sa inflation sa Pilipinas ang peso, ilabina human gipatas-an sa Bangko Sentral ng Pilipinas kon BSP ang inflation outlook alang sa 2027 tungod sa posibleng epekto sa El Niño ug pagtaas sa suholan.
Dugang pa niini, nagpaabot usab ang mga investors sa bag-ong signal bahin sa direksyon sa interest rates sa United States, ilabina sa mga pamahayag ni Federal Reserve Chair Kevin Warsh sa Jackson Hole Symposium.
Matud sa usa ka trader, posibleng magpabiling huyang ang peso sa dili madugay ug mahimong moabot tali sa P61.75 ug P62 kada dolyar.
Tungod sa pagkahuyang sa peso, nabutang usab sa pagtagad ang risgo sa pagsaka sa presyo sa imported nga mga produkto.