Gibutyag ni Ombudsman Jesus Crispin Remulla nga ang Davao City maoy giilang sentro sa sistema sa korapsyon o “epicenter” sa mga proyekto sa flood control sa wala pa ang administrasyon ni Pangulong Ferdinand Marcos Jr.
Kini human gipangutana ni ACT Teachers Party-list Representative Antonio Tinio ang Ombudsman kon adunay gihimong imbestigasyon sa mga alegasyon sa insertion, ghost projects ug korapsyon sa mga proyekto sa flood control sa miaging administrasyon.
Matud ni Remulla, lisod sudlon ug makakuha og impormasyon gikan sa maong sistema tungod kay daghang tawo ang dili mosulti, apan mipasalig siyang magpadayon ang ilang imbestigasyon.
Gipasabot usab sa Ombudsman nga gisusi nila ang mga pondo nga nasulod sa mga proyekto sa flood control sa Davao ug uban pang mga lalawigan aron matino ang mga sumbanan sa posibleng korapsyon ug asa kini nagsugod.