Gisupak ang Philippine Psychiatric Association o PPA ug Philippine Society for Child and Adolescent Psychiatry ang plano sa Department of Education o DepEd nga magpatuman og simultaneous school safety drill alang sa aktibong pag-atake sa tanang eskwelahan sa nasud.
Sumala sa mga grupo, importante ang pagpangandam sa mga estudyante, magtutudlo ug kawani alang sa posibleng pag-atake sulod sa eskwelahan.
Apan ilang gikabalak-an nga ang paggamit og “hyper-realistic” nga simulation, imbes makatabang sa pagpangandam, posible kini nga makahatag og kahadlok ug dugay nga kadaot sa pangisip, ilabina sa mga bata.
Matud sa asosasyon, dili direktang pasabot nga mas epektibo ang usa ka drill tungod kay mas tinuod ang pagpakita sa hulga.
Kinahanglan usab nga tagdon ang edad, kahimtang sa pangisip ug kaandam sa mga estudyante sa dili pa ipatuman ang maong kalihokan.
Isip alternatibo, gisugyot sa mga psychiatrist ang trauma-informed protocols ug table-top exercises nga makat-onan sa mga estudyante ug personnel, kung unsay angay buhaton panahon sa emerhensiya, apan dili sila ibutang sa makahahadlok o makapa-trauma nga kahimtang.