Dili ubos sa 37 ka tawo ang naangol human giyugyog sa usa ka Magnitude 5.9 nga linog ang pipila ka bahin sa Japan, nga nagbilin og kadaot ug kasamok sa mga lumulupyo sa naapektahang mga dapit.
Sumala sa Japan Meteorological Agency (JMA), nahitabo ang linog sa mabaw nga giladmon hinungdan nga mas nabatyagan ang kusog nga pagyugyog sa mga bilding ug panimalay. Bisan pa man niini, walay gipagawas nga tsunami warning ang mga awtoridad ug walay nakitang hulga sa dako nga balod sa kadagatan.
Kadaghanan sa mga biktima nakatagamtam ug taphaw nga mga samad ug garras tungod sa nangahulog nga mga gamit ug nabuak nga mga bildo sa sulod sa ilang mga balay ug opisina. Padayon karon ang inspeksyon sa mga awtoridad sa kinatibuk-ang epekto sa maong kalamidad samtang gipahimangnoan ang publiko nga magmabinantayon sa mga posibleng aftershock.