Mipabuto og gibana-banang 10 ka short-range ballistic missiles ang North Korea padulong sa sidlakang bahin sa kadagatan sa nasod kagahapong adlawa, pipila ka oras human gipaubsan sa Estados Unidos ug South Korea ang ilang hiniusang military exercises.
Matud sa South Korean Joint Chiefs of Staff, gilunsad ang mga missile duol sa kaulohan sa North Korea pasado alas-5 sa hapon.
Gipalig-on sa South Korea ang ilang pagbantay ug nakigtambayayong sa US ug Japan sa pagmonitor sa sitwasyon.
Usa ka adlaw una niini, gisaway ni Kim Yo Jong, igsoon ni North Korean leader Kim Jong Un, ang pagkunhod sa military exercises, ug miingon nga dili kini makausab sa ilang pagtan-aw niini isip hulga.
Ang pagpabuto sa mga missile nagpatungha og bag-ong kabalaka ug tensyon sa Korean Peninsula ug sa mga paningkamot nga mapasig-uli ang negosasyon tali sa North Korea ug US.