Tambag nga mopauli tungod sa kahubog gikasuko: 46-anyos nga lalaki gidunggab sa kauban sa trabaho sa Kibawe

Nagpabilin karon sa balay tambalanan ang usa ka 46-anyos nga lalaki human kini dunggaba sa iyang kauban sa trabaho nga nahubog atol sa kasaulogan sa sitio fiesta sa Purok 4, Mianlas, Barangay Marapange, Kibawe, Bukidnon niadtong makalabayng adlaw sa hapon. Subay sa impormasyon  gikan sa Kibawe Municipal Police Station (MPS), nag-inom ang biktima kauban ang iyang pamilya dihang miabot ang 41-anyos nga suspek nga hubog ug nagpangita og gubot. Gisulayan sa biktima sa pagtambag ug paghatod ang suspek ngadto sa iyang motorsiklo aron paulion, apan miulbo ang ilang lalis diin kalit nga gidunggab sa suspek ang biktima sa makadaghang higayon sa nagkalain-laing bahin sa lawas. Dali nga nagpahigayon og hot pursuit operation ang Kibawe MPS diin malampason nilang nadakpan ang suspek sa Purok 3, Balintawak sa samang lungsod. Tingkagol na sa selda sa Kibawe MPS ang suspek nga nag-atubang sa pormal nga kasong kriminal, samtang ang biktima padayong giatiman sa Bukidnon Provincial Hospital–Kibawe.