Posibleng magduha-duha ang prosekusyon sa pagpresentar kang Ramil Madriaga isip testigo sa impeachment trial batok kang Vice President Sara Duterte, sumala sa abogado sa depensa nga si Atty. Paolo Panelo.
Matud ni Panelo, kung dili man gani ipresentar si Madriaga sa prosekusyon, mahimong ipatawag kini sa depensa aron gamiton ang iyang mga pamahayag sa pagkontra o pagpanghimakak sa mga alegasyon batok sa Bise Presidente.
Kahinumduman nga lakip si Madriaga sa witness list sa depensa isip unang testigo.
Gipasabot ni Panelo nga ang mga perjury complaint batok kang Madriaga mahimong gamiton sa depensa aron kuwestiyonon ang iyang mga pahayag ug kredibilidad isip testigo.
Matud pa niini, nakabase ang ilang kumpiyansa sa mga ebidensyang gilakip sa mga reklamong gisang-at batok kang Madriaga.
Samtang, nadawat na sa depensa ang kopya sa ikaduhang perjury complaint batok kang Madriaga, lakip ang mga ebidensya niini. Kung ipresentar man kini sa prosekusyon, miingon si Panelo nga andam ang ilang kampo sa pag-cross-examine kaniya.