Giila sa usa ka health expert nga ang social media usa sa nag-unang hinungdan sa pag-usab sa pamatasan, pamaagi sa pagkat-on ug pag-atubang sa mga kabataan sa kasamtangang panahon.
Sa pakighinabi sa Bombo Radyo Malaybalay kang Stella Ferrez, usa ka psychometrician, hugot nga gipasabot niini ang kamahinungdanon nga ang kanunay nga paggamit sa gadgets ug social media nakaimpluwensya sa pailob, paglahutay ug emosyonal nga pagdumala sa mga kabataan.
Gipasabot ni Ferrez nga ang paspas nga pag-uswag sa teknolohiya nakapaanad sa mga kabataan sa dali nga pagkuha sa impormasyon ug paspas nga komunikasyon.
Matud niya, bisan pa og lahi ang ilang pamatasan kumpara sa mga miaging henerasyon, kabahin kini sa kausaban sa katilingban nga kinahanglan sabton ug angayng ipahiangay.
Gipunting usab niini ang dakong papel sa mga ginikanan sa hustong paggiya ug pag-amuma sa ilang mga anak taliwala sa kusog nga paggamit sa gadgets ug social media.
Matud niya, importante ang balanse tali sa teknolohiya, kultura ug personal nga pakig-uban aron matabangan ang mga kabataan sa ilang emosyonal ug sosyal nga paglambo.
Subay niini, gipasabot eksperto nga halapad ang scope nga posibleng makaimpluwensya sa kabataan dili lamanag ang ginikanan apan lakip usab ang mga tawo nga nagpalibot ug makauban niini.