Duha ka estudyante ang kumpirmadong patay sa natigayong shooting incident sa Ateneo de Zamboanga University High School Campus sa Barangay Lunzuran, Zamboanga City, takna sa alas-7:50 sa buntag ning Martes, Agosto 18. Base sa inisyal nga imbestigasyon sa Police Regional Office-9, ang biktima giila nga si Patrick Dylan Wee, Grade 10 student nga nakaplagang patay sa ika-upat nga andana.
Ang giingong suspek giila usab nga si Mohammad Mael S. Jalani, Grade 9 student, nga nakit-ang patay sa ika-lima nga andana human gikatahong mipusil sa iyang kaugalingon.
Matud sa kapulisan, walay klarong provocation nga nakita sa inisyal nga imbestigasyon sa wala pa giingong mipabuto ang suspek sulod sa lawak.
Gikataho usab nga nagkadala kini og usa ka pistol ug usa ka rifle sulod sa campus. Gikataho usab nga nag-live pa sa social media ang suspek samtang nahitabo ang insidente.
Dugang pa, gipalagpot na sa pwesto ang amahan sa 14-anyos nga suspek sa sa insidente diin nagsilbi kini isip Customs Police Chief sa Bureau of Customs o BOC sa Zamboanga City.
Sumala kang Customs Commissioner Ariel Nepomuceno, gihimo ang dinaliang pag-relieve sa opisyal samtang nagpadayon ang lawom nga imbestigasyon sa kapulisan ug sa BOC.
Susihon usab sa mga otoridad kung adunay kalambigitan ang posisyon sa amahan sa pagpanag-iya o pag-access sa mga armas nga giingong gigamit sa pagpamusil.
Sa pagkakaron padayon ang imbestigasyon aron matino kung giunsa pagkuha ug pagsulod sa campus ang mga armas, ingon man ang legalidad sa pagpanag-iya niini.