MALAYBALAY CITY, BUKIDNON — Gisupak pag-ayo sa National Citizens’ Movement for Free Elections (NAMFREL) ang mga sugyot nga i-oktaba pag-usab ang Barangay ug Sangguniang Kabataan Elections (BSKE), diin gipadayag sa grupo nga makadaot kini sa demokratikong katungod sa katawhan.
Sa pakighinabi sa Bombo Radyo Malaybalay, gipahayag ni Nestor M. Banuag Jr., Director alang sa Social Involvement and Advocacy Program sa NAMFREL Northern Mindanao, nga kinahanglang regular ug tukma sa panahon ang pagpahigayon sa eleksyon. Gipatin-aw usab ni Banuag nga ang pondo alang sa eleksyon dili angay tan-awon nga ordinaryong gasto, kundi usa ka puhunan sa katungod sa mga botante sa pagpili o pag-ilis sa ilang mga lokal nga lider.
Dugang pa ni Banuag, wala silay nakitang lig-on nga rason aron i-oktaba na usab ang BSKE, labi na nga nagpadayon na ang pagpangandam sa Commission on Elections (COMELEC) ug uban pang mga kapikas sa panggamhanan. Kasamtangang accredited na ang NAMFREL alang sa BSKE ug nagpadayon ang ilang pagpangandam sa voter education ug pag-monitor sa eleksyon, kauban ang pagtutok sa eleksyon sa BARMM.