Sikop ang tulo ka giingong street-level nga tigpayuhot og gidiling droga human gipahigayon ang usa ka joint buy-bust operation sa mga awtoridad sa Purok 2, Barangay 2, Lungsod sa Talakag niadtong Domingo sa hapon, Agosto 16, 2026.
Giila sa pulisya ang mga nasikop nga duha ka lalaki ug usa ka babaye nga pulos anaa sa hustong pangedaron. Nasakmit gikan sa ilang posisyon ang lima ka sachet sa gitoohang shabu nga adunay gibug-aton nga 3.7 gramos ug nagbalor og ₱25,160, kauban ang pipila ka kagamitan sa paggamit og droga, duha ka cellphone, ug ang gigamit nga buy-bust money.
Ang maong operasyon gipahigayon sa Talakag Municipal Police Station (MPS) kauban ang 1st Bukidnon PMFC, Provincial Intelligence Unit, ug 1004th RMFB 10. Kasamtangang gitanggong sa Talakag MPS ang mga suspek samtang giandam na ang kasong paglapas sa Republic Act 9165 o Comprehensive Dangerous Drugs Act of 2002 batok kanila.