Nakatala og bag-ong Guinness World Record ang usa ka lalaki sa China human niya mapatuyok ang 33 ka hula hoops sa iyang lawas samtang nakabitay pabaliktad.
Si Yan Yanjia gibitay pabaliktad sa usa ka playground equipment sa Guilin, Guangxi, China, samtang gitabangan siya sa duha ka higala sa pagsul-ob sa mga hula hoop gikan sa iyang ulo hangtod sa hawak.
Malampuson nga napadayon ni Yanjia ang pag-tuyok sa tanang hula hoops sulod sa gitakdang oras sa Guinness World Records, maong nakuha niya ang titulo alang sa pinakadaghan nga hula hoops nga napatuyok samtang nakabitay pabaliktad.
Nalabwan niya og 10 ka hula hoops ang kanhing rekord.
Matod ni Yanjia, nagsugod siya sa pagbansay og hula hoop walo ka tuig na ang milabay isip paagi sa pagpaniwang.
Karon, tumong ni Yanjia nga makab-ot ang laing rekord pinaagi sa pagpatuyok sa mga hula hoops samtang nag-pull-ups.