Naglaum ang Commission on Elections o COMELEC nga makahatag na ug klarong desisyon ang Kongreso sa umaabot nga Barangay ug Sangguniang Kabataan Elections o BSKE, nga gitakda sa Nobyembre 2, 2026.
Matud ni COMELEC Chairman George Erwin Garcia, adunay duha ka hearing ang Kongreso aron madungog ang baruganan sa mga stakeholder bahin sa posibleng pag-postpone sa eleksyon.
Kinahanglan usab sa poll body ug igong panahon aron ma-adjust ang ilang mga preparasyon. Gibutyag ni Garcia nga mokabat sa P8 bilyon ang pondo alang sa BSKE gikan sa kinatibuk-ang P19 bilyong budget.
Kung ma-postpone ang eleksyon, adunay mga election materials nga magamit pa, apan mahimong mausik ang ubang supplies sama sa indelible ink ug mga bolpen.
Dugang pa ni Garcia, posibleng mokabat sa P3 bilyon ang dugang nga pondo kada tuig alang sa BSKE tungod sa pagdaghan sa mga rehistradong botante.