Kumpiyansa ang House prosecution nga dawaton sa Senate Impeachment Court isip ebidensya ang mga bank records, tax documents ug uban pang financial records ni Vice President Sara Duterte ug sa iyang bana nga si Atty. Mans Carpio.
Sumala kang Prosecution Legal Spokesperson Atty. Benjamin Tolosa, importante ang pag-isyu sa subpoena aron makuha ug maapil sa rekord sa impeachment trial ang mga dokumentong mahimong gamiton sa pagpresentar sa kaso bahin sa unexplained wealth.
Gipasabot ni Tolosa nga dili pa opisyal nga ebidensya ang maong mga dokumento tungod kay kinahanglan pa kining pormal nga i-presenta sa prosecution.
Gibarugan usab sa prosecution nga legal ug adunay lig-ong basehan ang subpoena nga gipagawas sa Impeachment Court, lakip na ang mga probisyon sa balaod ug mga nauna nga desisyon sa korte nga ilang giingong nagsuporta sa paggamit sa maong mga dokumento sa impeachment proceedings.
Dugang pa ni Tolosa, kung hagiton sa kampo ni Duterte-Carpio ang subpoena pinaagi sa legal nga mga remedyo, andam ang prosecution nga depensahan ang desisyon sa Impeachment Court.